比思論壇

標題: 台中、清境、墾丁5日4夜之旅 [打印本頁]

作者: 匿名 時間: 2011-2-25 21:12
標題: 台中、清境、墾丁5日4夜之旅
第一晚：台中公園快捷假日飯店 http://www.holidayinnexpress.com.tw/
台中市中區自由路二段94號
上官網自己訂, 用Advance Purchase專案訂房, 平d
三人房 (雙人床+沙發床), 包早餐
共NT$2981 (連service charge, visa card過數)

第二晚：清境峰情人民民宿 http://www.taomt.com.tw/main/profile/index.php/
南投縣仁愛鄉大同村榮光巷46號
舊年都係住呢間, 今年繼續住佢, send e-mail訂房
三人房 (雙人床+單人床), 包早晚餐 (一泊二食專案)
共 NT$2697 (全數去到即場付款, 但取消訂房必須預先通知)

第三, 四晚：墾丁戀海126風情旅棧 http://www.lovesea126.idv.tw/
屏東縣恆春鎮墾丁里大灣路126號
朋友建議住大灣路, 可望海又近墾丁大街, 正式旺中帶靜, 靜中景又靚
戀海四人房(兩張雙人床, 有陽台對正海), 包早餐
共 NT$6600 (先在香港過左一半錢(HK$825)入佢地恆生戶口, 尾款即場再付)

作者: 匿名 時間: 2011-2-25 21:13
第一日

當日10:10起飛, 由於做左網上報到, 我地大概早一小時到達機場櫃位寄行李. 出發啦~~

原來係要搭車去外面行上機, 架車好多人呀! 企到爆晒~!! 我地心諗, 唔通就係一車過, 全機就係咁多人?
去到落車上機喇~

預早做左網上報到, 揀位時發現一行得4個位, 已經估架機係細…但估唔到真係咁細…

一眼望晒....

落機後, 先在機場換青年旅遊卡, 在某些地方入場費有優惠啊~!!

差d唔記得提下大家!!
台中機場入面係無電話卡賣, 旅客服務中心的人叫我出去台中市區的7仔買
但市區入面7仔又好多間都賣斷貨(我要的是預付卡, sim卡入手機o個種), 最後在台中市內行行下見到遠傳電訊的舖頭走入去買先買到

我地一行三人坐計程車回酒店放底行李, 由機場去酒店大約450台幣
之後我地就去左國泰世華兌台幣, 行左10分鐘就到
入到去要俾passport先換到, 佢地好認真地驗我地d錢, 仲逐張抄底no.

然後就去左勤美誠品逛

行完書店及精品店, 就在樓下買mister donut吃

之後去左間café, 叫robot station 2, 幾得意的café, 食物都幾好啊~~

一路行一路行, 入黑了, 就去了逢甲夜市

行到中間就有逢甲大學的入口

個夜市好大…好多野食

黃金賊

懶人蝦

大腸包小腸

吃到九點幾, 就返左酒店休息, 要早d休息, 明早還要趕車上清境~!!
第一日完

作者: 匿名 時間: 2011-2-25 21:14
第二日

因為8:20就有客運上清境, 所以7點就去食早餐
酒店的自助早餐, 有中有西, 都幾好呀~

酒店的餐廳在地下, 上幾層是outlet, 再上頂的幾層先係酒店房

間酒店好似個筒咁, 可以話無「尾房」呢個問題… 我地間房的窗向內, 打開窗簾就會見到對面d房的窗簾

check out後, 沿著門口的雙十路, 行左1分鐘就已經去到南投客運站

架車都幾舒適

上車前有個計程車司機黎兜客, 我地無理佢就行左入去南投客運個舖位, 認住d工作人員有件黃色背心著住的!! 坐上清境單程大約係NT$240

夠鐘就即刻開車, 先去台中高鐵站

去到埔里站會停耐少少, 俾大家去下廁所

差唔多去到清境, 會經過碧湖, 是南投縣其中一個景點
但舊年我地坐計程車上去, 架車身唔夠高, 影唔到個全湖景, 今年坐客運就OK了!!

去到清境龍莊站就落車, 側邊的斜路上去就是我地第二晚的民宿了

揀好房, 放底行李, 休息一下就由民宿的人車我地去青青草原了
入場費, 平日是NT$80, 有青年旅遊卡, 只需NT$60
重遊清境, 真係好舒服~~

綿羊城堡

由於不是星期六, 日去, 加上官網話格蘭先生休左假, 所以無綿羊show看~~
但睇羊仔一樣咁開心~

清境真是一個好靚的地方, 有人在青青草原影婚紗相

行完青青草原, 就行左去觀山牧區, 再行去壽山園經步步高昇步道, 去到清境遊客中心已經兩點半了, 食個飯, 再行落去seven同星星克門口坐下飲下野, 跟住就行返落去民宿等開飯了~

民宿6點開飯, 3個人有五餸一湯, 白飯任裝, 相當豐富

食完飯在民宿門口睇星, 見到對面個英式建築的民宿夜晚著左燈好漂亮

日景 (返民宿前行左入去影的!!)

夜景

因為見個天係咁閃電, 好驚落雨 (後來先知原來當日台北地區豪雨!!), 於是就在房間的露台影星, 好多星呀~~

呢晚係要更早訓, 因為第二日4:10就要集合上合歡山睇日出啦!!!

第二日完

作者: 匿名 時間: 2011-2-25 21:19
第三日

之前報左名去合歡山睇日出, 其實只係同民宿的人講聲, 佢地就會同我地報名join local tour.
如果有朋友想去睇日出的話, 記得先要報名, 因為我見前一晚食飯時有其他民宿租客想去上去睇, 但已經太遲無位了, 所以佢地最後要自己包車上合歡山(當然係貴過join local tour).
(題外話, 佢地包車可能諗住時間彈性d, 於是8點幾先出發, 不過其實我地已經睇完返落黎剛食早餐, 咁晏上去就miss晒d星夜, 晨曦, 日出啦!! 相信上到去得個曬字!! 建議大家如果真係想睇合歡山, 早少少起身十分值得!!)

我地教左鬧鐘, 3:30就起身梳洗, 4:10要落去民宿對開的大馬路集合, 坐共乘的旅遊車(一車24人). 導遊兼司機大佬已經將架車泊定o係民宿外的馬路等候. 旅遊車車身紅色, 玻璃窗去到seat位, 看外面外得清楚d, 真正的觀光旅遊車呀~

上車時, 導遊大哥問我地夠唔夠衫, 話山上面只有10度. 民宿的人一早都同左我地講, 清境得17度時山上可以10度以下, 已叫左我地將最厚的衫穿上. 但呢個local tour好周到, 佢會借羽絨俾我地, 見車上還備有冷手套, 真係好!! 他說今天天氣好, 可以看星和最美的日出~!! 導遊大哥先收我地每位NT$400, 然後就開車去其他民宿接人.

當日總共有2架車去接人, 接齊人之後, 就去到第一個景點, 青青草原門外的停車場看星. 上到咁開揚的地方看, 真係滿天都係星星~ 導遊大哥集齊兩車的人, 教我地睇星. 佢用支laser燈一照, 一條綠光射上天, 好似掂到粒星咁!! 然後佢就教我地認南極星, 北極星, 看獵戶座, 金牛座… 看到慢慢移動的人造衛星, 也見到一閃而過的流星!!

我都影到流星呀~!!

之後再上車又再繼續往合歡山出發!! 一路行, 已經5點幾, 遠方的天有少少光光地, 有些團友已急不及待在車上影相 (例如我)

去到第二站, 太魯閣國家公園的牌前, 導遊大哥說在這裡看日出前的雲霞是最美的. 果然好靚~

太陽染紅了雲

另一邊, 太陽的紅光一行行的劃破深藍色的天, 更美

再下一站, 就準備看日出了. 下車後, 導遊大哥問我地有無太陽眼鏡, 無的可以借用, 實在太貼心了!! 他說仲有10分鐘太陽就會從山昇出來, 而太陽出來的頭10-15秒是最漂亮的, 大家要注意看, 又教我地點可以影到靚的日出呢~

導遊大哥在解說, 大家都著晒羽絨勁凍時, 他還是如山下一樣的衣服, 完全無加外套…勁!!

導遊大哥說「太陽要出來了, 看前面, 不要看我~~」

好似粒鑽石咁耀眼~!!

跟住就上去合歡山主峰步道, 上去再看雲海和初出的日光, 雖然只係行左上去少少, 但又係好靚的景致

最後就衝上今次旅程的最高點, 武嶺, 有3275公尺, 看出去群山, 好壯觀!!

就係呢兩架紅色旅遊車接載我地架啦~

我睇到呢d景色時, 完全明白到咩叫做靚到想喊~! 真係好靚, 好令人感動~!!

之後就返民宿食早餐, 展開南下墾丁陽光與海灘之旅~~
(待續)

作者: 匿名 時間: 2011-2-25 21:21
第三日‧下

返到民宿已經8:10, 吃過早餐就會向台中高鐵站出發. 本來打算9點幾先走, 點知由於共乘車未能夾到時間, 要8:30就出發. 於是勁快的倒了個早餐入肚, 相都黎唔切影…

共乘車行得好快, 10:00已去到台中高鐵站, 車費約為NT$300一位. 我地買了10:22南下往左營站的自由座車票, 售價為NT$765. 買自由座已ok, 因為其實唔係咁多人坐高鐵…

11:05左右, 準時到達高鐵左營站

我地要等埋一個朋友, 而且約左共乘車2:30先去墾丁, 所以有好多時間hea下
原來高鐵左營站係無行李儲物位, 職員建議我地過去隔離的新光三越的3樓服務台寄存行李. 於是我地行過天橋, 就去到一個無乜人的新光三越, 寄存行李又唔收錢, 服務仲好好添~

安心放底行李後, 行左一輪新光三越和彩虹市集, 不過無乜野好行, 而且客人亦十分疏落…行左一陣food court都唔覺得特別想食. 所以就坐高雄捷運去左巨蛋站, 行一下漢神巨蛋購物廣場

高鐵捷運都有夜間女姓專卡

巨蛋

食飽飯, 返左去左營站拎返d行李, 司機大佬就黎左車我地去墾丁的民宿. 這是book墾丁包車時預約埋的共乘車, 每位NT$350. 沿途見天陰陰, 行行下仲落雨…心諗都係要有心理準備去海生館了…

去到墾丁竟然天晴~~!! 在路上見到個海已經覺得好靚好藍, 超想落車望住個海~~ 好彩我地book左的民宿是在大灣路, 對正大灣沙灘, 咁就日日都對住個海喇!!

落車了~! 這是我們的民宿, 最右手邊的就是了!

雖然佢外殼係平凡過隔離o個d, 但一入到民宿, 即刻覺得好乾淨, 好舒服. 上到間房, 真係正, 仲要係單邊房, 隻窗加埋個露台望出去, 無敵海景~~~~ 房的設備很好, 有小雪櫃, 廁所又乾淨, 床係三間住宿點中最舒服的一張, 而枕頭仲要係一個軟一個硬啊~!!

廁所好光猛又乾爽呀~!!

抖左一陣, 雖然有一陣雨同埋有舊黑雲, 後來見天色好返, 就出左去對住的大灣沙灘影日落.

今日我地見證住太陽伯伯辛勞工作呀~~ 晨早睇住佢出黎, 黃昏就睇住佢收工~~
多謝佢咁眷顧我地, 等我地睇左咁多美麗景色

入黑了, 又係掃街時間, 行3分鐘就去到墾丁大街, 方便~!!

一路掛住食, 加上久唔久又黎一陣大雨, 無影到相, 失敗…不過唔緊要, 食物相其他的師兄都應該有, 唯有咁安慰自己啦~!

第三日完

作者: 匿名 時間: 2011-2-25 21:21
第四日

早晨啊~ 今日天氣非常之好, 打開個窗簾就係陽光與海灘, 即刻就拎起份早餐出露台食, 感受一下對住個海的舒暢~

越近m記 o個邊的大灣路, 個景就越無咁靚,不過應該會無咁西斜

望住個海好舒服

早餐會送上房, 有三文治, 一份生果,一包甜餅, 仲有一杯飲品

今朝訓9:30先起身, 因為前一晚有個小意外發生了…男友半夜發燒, 但我地幾個人身上都無藥, 卒之佢訓到三點就去左大街的便利店希望買d退燒藥之類. 我當然勁擔心訓唔到…坐住o係露台等佢返黎. 等緊的時候, 發覺熄左街燈的大灣路都可以望到好多星星, 而且呢個時間街上無人, 在露台都聽到海浪聲, 相信這才是墾丁本來的面貌. 呢個星夜亦都係好靚, 不過o個刻點會有心情影相…所以大家下次去墾丁都可以考慮下半夜觀星聽海. 男友回來後, 話幾間便利店都無藥賣, 要買藥必須等上午藥房開了才有…咁唯有再休息下等退燒…

食完個早餐, 男友亦已退燒, 就照計畫行事, 在樓下會合我地個包車司機, 先去後壁湖, 2個人去玩浮潛, 而其餘2人就去坐半潛艇.

司機大佬帶我地去到一間叫「上安」的公司放底我地玩浮潛的2人, 老闆娘話俾優惠我地, NT$300一位, 抵玩呀. 我地女的就換泳衣+潛水衣, 男的就底褲+潛水衣, 再穿鞋(著左o個隻鞋唔會"扇"腳的!!), 又分配一個潛水鏡俾我地, 有近視的還有度數配備的喔~!!

然後我地就跟住一車的出到去海邊, 教練教我地點帶潛水鏡和點樣呅住支管呼吸後, 就帶我地出去玩了~!! 浮潛好玩, 個海好靚, 唔使去到好出已經見到「海底奇兵」的小小丑魚nemo同埋o個條有長長背鰭的鐮魚gill!! 好可惜我無入得水的相機, 影唔到水底世界…

同行有個當地人的爸爸帶住兩個仔仔去玩, 佢地帶埋一袋方包去鰃魚, 佢地拎住兩塊麵包入水, 雖然好快就溶左, 但佢地揚揚手, d麵包碎溶出黎, 魚仔就走埋黎, 我跟住佢地尾睇都好開心~~

不想下水的朋友去了坐半潛艇, 據佢地形容, 隻艇幾窄, 兩行位, 背對背咁坐. 會去到d比較深水的地方. 不過睇左一陣就有d暈, 所以上返上層吹吹海風.

個模型就係個半潛艇的樣

佢地影出去的珊瑚

我地一路都擔心, 去玩浮潛會耐過玩半潛艇, 朋友就要等好耐…但司機大佬帶左佢地去行一個似科學館咁o既展覽館, 咁都叫做hea到d時間~~

等埋我地浮潛完上水後, 就一齊去後壁湖食海鮮啦~~
司機大佬無同我地一齊去, 佢叫我地幾間都好, 而入口右手面第一間是最便宜的, 我地見有位, 就去左o個間食. (我行到最後o個度, 見到好多promotion o個間「輝哥」, 勁多人等喎, 所以就都係唔去了…而我地揀左呢間其實都幾好食幾抵食啊~!!)

我地在魚缸點餐, 叫老板娘介紹, 又自己揀下咁, 點好菜就入去等食喇~
可惜, 我又唔記得影相…靠朋友都只係影左少少相咋…花枝丸同蒸魚都無影到… (花枝丸味道都幾好, 同埋好大粒, 有一個網球咁大!!! 個蒸魚就好抵食, 兩條魚, 每條約20cm長, 夾埋只係NT$240, 又好食喎, d肉質好嫰滑架~!! 我唔多食魚都食左好多, haha~)

大家必叫的魚生, 呢碟只係NT$200, 在香港應該只夠買三文魚o個行!!

最遠o個碟係炒曼波魚, d肉質好得意, 好似尤魚咁好彈牙的, 返黎查過資料, 先知佢原來真係魚黎o既… 中間o個碟係沙拉凍筍, 最近o個碟唔記得叫鯊魚咩, 黃色o個d就膠膠地, 肉o個d位就有點似煲左湯的瘦肉鞋鞋地, 但碟野無味的, 要點一個鹹鹹酸酸的醬汁食

我地坐左半張大枱, 坐左一陣就有3個香港女仔同埋佢地個司機黎坐. 佢地碟魚生同我地一樣, 但厚好多!!! 有熟人帶住係唔同d~!!!!
之後佢地個司機請左幾支海燕窩俾佢地飲, 我在食尚玩家見過, 一d個樣似膠水咁一pat pat的東西, 所以都望住睇下佢地食落係咩反應. 點知個司機見我地望望下, 佢又拎左兩支黎請我地飲!!! 話難得坐埋一枱係緣份, 大家都要玩得開心~ 於是我地就請佢地食幾粒花枝丸, 禮尚往來嘛~~ 我自己食落的感覺係甜甜地, 又好滑汕汕的, 雪到凍冰冰的都幾解喝~! 呢個質地的飲品好得意呀~~~

呢餐4個人食左NT$1080, 實在太抵食啦~!!! 下次再去墾丁一定要再食, 兼且諗辦法直送d魚生返黎!!!

食飽飽之後, 司機大佬就帶我地去行景點, 先去左貓鼻頭
貓鼻頭是台灣兩個尾巴之一, 亦是「陸客」的集中點之一 (注：司機大佬話, 陸客是他們的形容內地遊客的詞語) 亦都真係好多人....

舊石似唔似一隻張口的貓頭? 我就覺得一般囉…

跟住就去左白砂灣, 個沙灘好大, d沙好滑, 個海又好靚, 唔少人去游水去玩, 尤其是見到好多大學生, 好似玩ocamp咁, 個個都著一樣的衫, 同埋有個名牌掛o係身度

就算人多, 個沙灘咁大, 一d都唔逼
o個度有得沖身(NT$20), 沖手腳(NT$10), 可以放心玩沙玩水~~~

然後司機大佬就帶左我地去恆春, 去了東門上去影下相

就係拆淨一片牆…

對開有一個孤棚, 是中元節(農曆七月十五)時會有比賽, 鬥快沿住D柱爬上去, 最快上到去搶孤的就是贏. 但為加大難度, D柱會塗上油, 不過司機大佬話, 贏左有獎金的~!! 所以好多人都黎搶, 甚至變得國際性的比賽了.

之後我地就去左砂島賽車場玩高卡車, 司機大佬話, 佢以前都是在鵝鑾鼻開賽車場的, 後來因為政府話佢地違法經營, 所以就無做了, 而呢一檔都係佢地隔離, 由鵝鑾鼻搬出黎的. 我地去到就即刻玩得, NT$100玩7分鐘, 好玩呀~ 只係個軚好重, 要轉彎時要好大力~!!

玩完就差唔多四點幾, 司機大佬知我地想去南灣影下相, 所以就特登車我地去去影一影, 因為我地要趕住去關山睇日落呀~!!
南灣比白砂灣更多人, 所以無落沙灘, 係咁而影一野就走左了

跟住就拿拿臨趕上去關山睇日落, 因為好多人呀~!! 要搵個靚位影相先~

越近日落時間, 越多人

可惜呀, 俾雲遮實晒呀~!!!

不過雲霞都幾靚呀~~

天黑齊了, 就係時候去玩出火了
去出火o個度記得要帶電筒, 因為沿路都無燈的!!

朋友做了犯法野, 在門外買了d爆谷入去焗

唔知係咪肚餓, 都幾好食…

最後, 我地就去左墾丁大街的野宴食晚餐, 呢餐最豪亦最豐富啦~ 可以2小時任食燒烤, 火鍋, 雪糕, 汽水等, 埋單連服務費都唔使NT$500一位, 好開心~~

食飽後, 行左一陣墾丁大街, 夜D我地又做犯法野, 買左仙女棒玩寫字.
我地玩完有執走晒D垃圾, 但發覺, 除左夜晚的墾丁大街, 周圍係無垃圾筒的…民宿老闆娘話台灣D垃圾係要等人黎收的

WE LOVE TAIWAN~~

第四日完

作者: 匿名 時間: 2011-2-25 21:22
第五日

今天是旅程的最後一天了~ 仍然是天朗氣清, 我地真係好彩了~~

今日司機大佬會帶我地行東半島的景點, 首先就是去最近墾丁大街的船帆石
船帆石在海上遠看會似一個船帆, 近看似美國總統尼克遜的頭, 呢次我覺得似人頭了~~

然後就是去砂島, 那是保育區, 一片無人的沙灘, 清澈的海水, 靚到無得頂呀~~~

然後就是去鵝鑾鼻公園, 這個是台灣的第二個尾巴, 亦是另一個「陸客」到此一遊的地方.
除了「陸客」, 又有好多疑似玩緊ocamp的大學生在玩.
好多人都會影的燈塔和草地

展覽館內展示了以前的台灣海關關旗

鵝鑾鼻公園都幾大, 可以慢慢行, 行到最近海邊, 有條海濱棧道, 個景好靚架~~ (好似比較少人會行過去...)

釣魚郎

親吻石

行左成個幾鐘, 好熱呀, 司機大佬仲想請我地飲個椰子, 不過我地已經自己買黎飲左, 於是佢又送兩支汽水俾我地拎住飲~~

之後我地就去最南點了, 最南點要下車後行入去500米才到

一群港人企住o係度好耐在等影相, 影左你地入鏡真係唔好意思啦…

一邊望向太平洋

另一邊是巴士海峽

最後, 司機大佬車左我地去龍磐公園, o個度對正太平洋, 原來係一個睇日出的地方, 可以睇住個太陽在水上昇出來, 搵次有機會去睇下就好了~~

珊瑚礁岩層崩落而成為獨有的地形

一望無際的太平洋

風箏

遊完之後, 司機大佬車我地返民宿, 我地同佢影張相, 佢又趕住去做下一單生意了~~ 佢連飯都食唔切, 真係唔好意思啦~~

下午1點, 我地等到9人共乘車出返去高雄. 其實我地未諗到去邊度落腳好, 只係諗住要去買d手信同hea一兩個鐘再上機. 好彩同車有pair香港人, 同我地搭同一班飛機, 佢地話會去夢時代購物中心, 咁我地就跟住去喇~ 呢轉車, 每位盛為NT$350

去到夢時代, 同車的港人教我地落去B2的客戶服務中心寄存行李, 然後我地又去食去買喇~ 基本上要的手信呢度都買得到, 太陽餅, 豬肉紙, 鐵蛋, 鳳梨酥……應有盡有, 一應俱全!! 而且去高雄機場只係NT$200, 絕對推介俾去完墾丁即刻返香港, 但又要入貨買手信的朋友!!

最後去到高雄機場, 好細…感覺有點似紅磡火車站咁上下大…好彩在夢時代入晒手信!!
不過都唔夠台中機場細…台中機場我可以用超市收銀位counter黎形容…呢度排隊俾錢(過關), o個度出門口(就拎行李), 行多幾步就出機場了!!

回程機係A330飛機, 大機, 終於有電視睇~ 不過就係掛住睇電視…又唔記得影相

總括黎講, 呢次5日4夜之旅有「三好」, 天色好, 食物好, 遇到的人好~~
多謝我朋友Leo借佢d相俾我完成呢個遊記, 亦都多謝大家支持我呢個post
希望再有機會去台灣玩, 亦都從我呢個post, 吸引到大家去台灣玩啦~~

全卷完

作者: LINUS 時間: 2011-2-27 18:37
回復 ping7g 的帖子

最愛民宿,又平,又靚,又正

歡迎光臨比思論壇 (http://108.170.5.74:8080/)